Gjatë vizitave në terren të realizuara gjatë vitit 2011 në Kosovë, gratë nga OJQ-të e nivelit lokal, gratë asambliste po ashtu nga niveli lokal, si dhe gratë të cilat nuk janë të përfshira në asnjë organizatë kanë shfaqur brengosjen për shumë çështje që kanë të bëjnë me fuqizimin dhe pozitën e gruas, ndër to ishte çështja e shëndetit të gruas. Nga të gjeturat në vizitat në terren të cilat përfshijnë dhe vizitën e Grave deputete në Institutin Onkologjik të Prishtinës, është cekur se gratë, posaçërisht gratë nga viset rurale nuk kanë qasje të duhur në shërbimet shëndetësore. Për më tepër, Grupi i Grave Deputete është zotuar që do të implementojë një projekt i cili qëllimin kryesor e ka blerjen e një mamografi mobil. Pas dy vite punë dhe angazhim si dhe përkrahje nga shumë donatorë vendorë dhe ndërkombëtarë mamografi mobil është blerë më 31 tetor 2014 dhe i mori përgjegjësitë si në vijim. Ministër, pas një kohe të blerjes së këtij mamografi, një kohë shumë të shkurtër mamografi u prish. Përpos asaj që keni deklaruar në media se me rastin e mamografit po merret hetuesia, çka mund të na thoni konkretisht për këtë dhe kur do të hyjë në funksion mamografi mobil? A ka krim të organizuar në Qendrën Klinike Universitare apo edhe në Shërbimin spitalor dhe zoti ministër, plani për veprim të mamografit mobil ka ekzistuar dhe kjo ka qenë me këtë renditje, në tetor, nëntor, në Qendrën Klinike Universitare, dhjetor: Podujeva, Drenasi, Graçanica, Fushë Kosova, Obiliqi, Ferizaj, Kaçaniku, Shtimja, Lipjani, Shtërpca, ndërsa deri sot përpos në Qendrën Klinike Universitare, që janë kryer disa shërbime ky mamograf s’e ka kryer asnjë shërbim. Kush do të jetë përgjegjës për të gjitha ato veprime dhe gratë nëpër komuna që janë lajmëruar se do të bëjnë mamografin mobil duke e ditur se ekzaminimi i hershëm i kancerit të gjirit shpëton jetë. Para disa kohësh, nga Qeveria e Kosovës janë ndarë 5,5 milionë euro për trajtimin e fëmijëve që vuajnë nga sëmundjet kanceroze. Kjo shumë e parave të grumbulluara ka qenë nga refuzimi i deputetëve për rritjen e pagave, si dhe të personave të tjerë zyrtarë në nivelet e larta ku kanë punuar në Qeveri.
Pyetja parlamentare: Ministër, a mund të na japësh shpjegim - ku janë këto 5,5 milionë euro?

Rreth 120 pacientë kosovarë që janë në trajtim të vazhdueshëm me ilaqin ‘CellCept’, i cili përdoret për transplantim të veshkave, hasin në mungesë të këtij medikamenti në Qendrën Klinike Universitare të Kosovës, përkatësisht në Klinikën e Nefrologjisë. Ka më shumë se 6 muaj që mungon ky ilaç, e që është i pashmangshëm për pacientët që i kanë transplantuara veshkat. Në rast se ky ilaç nuk përdoret, organi hidhet, pra hidhet veshka.
Çfarë keni ndërmarrë për sigurimin e këtyre preparateve, zoti ministër? Nëse i vizitojmë qendrat klinike shohim se mungojnë edhe  barërat për të sëmurë nga epilepsia edhe citostatikët, por edhe barërat tjera, qoftë nga lista vitale dhe esenciale dhe pse s’po merren për bazë rekomandimet e organit të prokurimit, i cili në raportin e fundit thotë, se asnjë rekomandim nuk është marrë për bazë nga Ministria e Shëndetësisë dhe kur do të hiqen këto praktika të këqija, në mënyrë që pacientët me kohë të furnizohen me këto barëra, që janë të domosdoshme?

Ligji për skemat pensionale të financuara nga shteti është aprovuar në maj të vitit të kaluar. Edhe pse nuk ka qenë ligj i kënaqshëm dhe i pritur nga pensionistët, megjithatë me kërkesë të ministrit, sepse nga ky ligj po varen shumë marrëveshje me rajonin dhe më gjerë, ne e kemi aprovuar këtë ligj.
Ministër, sa po zbatohet dhe a ka filluar të zbatohet, cilat nene kanë filluar të zbatohen nga ky ligj dhe, a ka ndonjë marrëveshje për pensionistët, të cilët punojnë në shtete të jashtme apo edhe për punë sezonale me shtetet tjera të rajonit? 

Ministër, kohë më parë është ngrehur një temë aktuale në mediat e Kosovës se ju në Gjilan e keni një ordinancë private, e cila është e regjistruar në emrin tuaj, por e cila asnjëherë nuk ka qenë e licencuar në Ministrinë e Shëndetësisë. Çka mund të na thoni për këtë temë?

Pyetja ka qenë për kryeministrin, sa prej ministrave tuaj kanë më shumë se një vend pune?
Ndërsa, tash së fundi, në raportin e Agjencisë Anti Korrupsion del se 1.509 zyrtarë të lartë kanë më shumë se një vend pune, me 5 funksione janë dhjetë zyrtarë, me katër funksione janë 31 zyrtarë, me tri funksione janë 312 zyrtarë, me dy funksione janë 1 155, që në total janë 1 509 zyrtarë të lartë të shtetit të cilët mbajnë më shumë se dy vende pune, ndërkohë që numri i papunësisë është diku 40% dhe siç thashë ka gjenerata të tëra të cilat me doktoratura presin për një vend pune. Sa është kjo etike dhe sa është ligjore?

Shkolla fillore dhe e mesme “Edmond Hoxha” në Junik numëron rreth 850 nxënës dhe rreth 40 mësimdhënës të cilët vijojnë mësimin në një objekt të vjetër të dëmtuar dhe përkundër ndërhyrjeve të kohëpaskohshme me riparimet e vetës komunës ky objekt është mjaft i amortizuar. Objekti i Shkollës “Edmond Haxha” është ndërtuar në vitin 1946 dhe nuk i plotëson kushtet që edhe më tej t’i zhvillohet proces normal edukativo arsimor. Duke qenë se komuna me një buxhet aq të vogël nuk ka mundësi të ndërtojë një objekt të ri, ata kanë bërë kërkesë tri vite radhazi që të finalizohet ndërtimi i një objekti të ri nga Ministria e Arsimit, por kjo edhe sot e kësaj dite nuk po ndodhë. Qytetarët e komunës së Junikut, prindërit e nxënësve nuk po donë që edhe më tutje të jenë të rrezikuar jetët e fëmijëve të tyre duke qëndruar nën kulmin e asaj shkolle. Prandaj, me të drejtë presin që Qeveria qendrore buxhetin e së cilës e mbushin edhe tatimet e tyre të filloj sa më parë ndërtimin e asaj shkolle.
Ministër, kur do të filloni dhe a do ta përkrahni një projekt të tillë të komunës së Junikut?

Ministër, rruga Junik-Gjeravicë është një çështje jetike për zhvillimin e turizmit në këtë trevë edhe të ekonomisë në komunën e Junikut. Prandaj, nuk ishte dashur që ky projekt kaq i gjatë dhe të mos përfundojmë punimet. Qeveria të merr seriozisht dhe të përfundojë edhe 7 km që kanë mbet pa u përfshirë në projekt. Kur do të vazhdohet me projektin, sepse sipas një projekti që është ndërtuar nga Ministria e Infrastrukturës është përkrahur ky projekt, domethënë rruga Junik-Gjeravicë kanë përfunduar gjithsej 14 km të asfaltimit të asaj rruge, ndërsa në projekt kanë mbet edhe 8 km.
Ministër, kur do të vazhdohet me realizimin e këtij projekti?

Ministër, kardiologjia është lëmi e veçantë dhe shumë e rëndësishme, por edhe jetike. Një trajtim i pacientëve ka kosto buxhetore që besoni xhepi i varfër i pacientëve të Kosovës nuk mund e përballon këtë trajtim. Unë e di që linja buxhetore që është ndarë për trajtim të pacientëve jashtë institucioneve publike shëndetësore, gati 70% shkon për shërbime kardiokirurgjie. Unë nuk po u akuzoj për këtë, por kërkesë jona ka qenë që më mirë këto mjete buxhetore të investoheshin në funksionalizimin e kardiokirurgjisë për shkak se pritja e gjatë e pacientëve dhe procedurat e shumta burokratike administrative shpeshherë po ndodh që pacientët të mos presin ta marrin atë ndihmë, por po vdesin duke pritur një ndihmë nga Ministria e Shëndetësisë. 
Ndërsa, pyetja që unë sot e kam drejtuar për ju ministër ka qenë a mund të na raportoni çfarë ka bërë komisioni që e keni ngrehur ju për funksionalizimin e kardiokirurgjisë? 

Është një problem shqetësues që edhe më herët e kam ngritur, ndërsa ministri Hyseni nuk e ka marrë mundin as të përgjigjet me shkrim, por as me gojë. 12 Çështja është heqja dorë nga shtetësia e Kosovës e cila ka shënuar shifra alarmante në pesë vjetët e fundit. Mbi 32 mijë qytetarë të Kosovës kanë hequr dorë nga nënshtetësia kosovare vetëm nga viti 2009, për të zgjedhur një nga shtetet e Bashkimit Evropian që nuk e lejojnë dyshtetësinë, kampion në zbrazjen e Kosovës është Gjermania. Në këtë ritëm të heqjes dorë nga nënshtetësia brenda 10 vjetëve Kosova do të ketë 100 mijë banorë më pak. Protagonistët të këtyre veprimeve thonë se edhe pse me zemër të thyer këtë po e bëjnë për perspektivën e familjes dhe perspektivën e fëmijëve të vetë. Ndërkohë që analistët e vlerësojnë që kjo situatë është baras me tragjedi kombëtare. Për 5 vjet 32 mijë qytetarë më pak, ndërsa për 5 vjetët e ardhshme do t’i kemi 100 mijë qytetarë më pak. Pyetja ka qenë: se cilat veprime do t’i merr ministri Hyseni në këtë drejtim, a do të lobojë me shtetet anëtare të BE-së, të cilat nuk e lejojnë dy shtetësinë dhe a do t’u mundësohet qytetarëve tanë sikurse edhe qytetarëve të shteteve tjera që të kenë dy shtetësinë? Por, është e pakuptimtë që ministrat dhe Qeveria nuk është marrë me këtë lëmi, sepse po shihet se kah po e qojnë Kosovën. Po e zbrazin Kosovën dhe sikur me veprimet e fundit që ka marrë kryeministri Mustafa, lidhur me demarkacionin edhe me asociacionin e komunave serbe. 

Kohëve të fundit, ministër, është parë që është mbyllur Kardiokirugjia. Për aktivizimin dhe funksionalizimin e Kardiokirurgjisë ka pasur investime të shumta nga donatorë të shumtë, ndaj të cilëve edhe kemi përgjegjësi, sepse investimet janë bërë për të dhënë përgjegjësi. Secili ministër i Shëndetësisë që po vjen në pushtet po thotë që Kardiokirurgjinë e ka prioritet për shkak se është e një rëndësie të veçantë, e se sa është prioritet kjo po shihet vetëm në mënyrë deklarative, sepse asgjë nuk është bërë për këtë repart dhe së fundit është mbyllur. Cilët do të jenë hapat konkretë, ministër, në aktivizimin dhe riaktivizimin e Kardiokirurgjisë, duke e ditë se është e një rëndësie vitale? 
Konkretisht, ministër, çfarë do të bëhet me pacientët, cilat janë procedurat që pacientët kosovarë duhen t’i ndjekin, në mënyrë që ta marrin sa më shpejt këtë shërbim? A keni lidhur ndonjë marrëveshje me spitalet private, në mënyrë që pacientët të drejtohen aty që ta marrin shërbimin sa më shpejt?

Me qenë se ministri nuk qenka këtu, çështja ka qenë loja që po bëhet me specializantët e Ministrisë së Shëndetësisë, të cilët nuk po paguhen me gjithë premtimet që i ka dhënë ministri. Është absurde se përpos gjendjes së rëndë në shëndetësi, gjendjes tejet të rëndë me të cilën jemi të informuar të gjithë, po abuzohet edhe me kuadro të larta. Për t’u bërë një mjek specialist Kosovës i duhen 23 vjet investim në një person. Ndërsa, këta persona dhe mjekë të kualifikuar t’i lësh në mëshirën e fatit, kjo është një turp që po i ndodh Kosovës. Nuk është e paarritshme që Qeveria të mos sigurojë paga për specializantët, për punën të cilën po e kryen dhe për kujdestaritë që po i mbajnë. Nëse vazhdojmë me këto politika diskriminuese ndaj personalit shëndetësor, në afat jo të gjatë Kosova do të mbetet pa kuadër shëndetësor, sepse mjekët e papunë, specialistët e papunën, specializantët e papaguar po e shohin perspektivën e tyre në vendet perëndimore, të cilët pa asnjë hezitim po i pranojnë dhe po i punësojnë.

Kur qe sjellë në Kuvend Ligji për veteranët e luftës patëm shpresuar dhe e përdorëm atë shprehjen “më mirë vonë sesa kurrë” dhe komisioni parlamentar ka punuar me përkushtim në amendamentimin e këtij ligji, në mënyrë që kjo kategori e cila ia solli dinjitetin Kosovës të vlerësohet dhe të trajtohet në mënyrë institucionale. Mirëpo, edhe përkundër amendamentimit dhe aprovimit të ligjit në Kuvendin e Kosovës, ende ka pengesa në zbatimin e tij dhe edhe sot shumë veteranë po përballen me problemet, sepse nuk po u paguhet ajo çka u takon me ligj. Zoti ministër, kur do të fillojë të zbatohet kjo çështje dhe kur do ta kenë rastin të gjithë veteranët ta marrin pagën, e cila u takon sipas ligjeve në fuqi?

Pyetja ka të bëjë me benefitet që duhet t’u japin bujqve dhe e dimë shumë mirë se kur është në pyetje përkrahja e bujqve dhe subvencionet, se si po shkon kjo punë. Gjithmonë po shkon me të njohshëm dhe në baza partiake. Bile-bile kemi raste ku po ndahen subvencione edhe për njerëzit që kurrë nuk janë marrë me bujqësi,në vend që ato subvencione të shkojnë në ato treva ku vërtet merret me bujqësi dhe u duhen ato subvencione. Nuk është mirë që bujqit anekënd Kosovës t’i vizitojmë veç kur kemi zgjedhje dhe t’ju premtojmë subvencione, në mënyrë që t’u marrim votën e tyre, por t’i përkrahim edhe kur nuk ka zgjedhje. Pyetja ka qenë se tash është sezoni i vjeshtës dhe bujqit i mbjellin ato produktet për vitin e ardhshëm, ndërsa ata kanë ankesa se ende nuk i kanë marrë subvencionet dhe pyetja konkrete ka qenë se kur do t’i marrin këto subvencione?

Pyetja ka të bëj me atë se çka do të ndodhë me bisedimet Kosovë-Serbi pas ngjarjeve të fundit? Këto kanë qenë ndërtimi i murit ilegal, arrestimi i zotit Haradinaj dhe më pas provokimet e hapura të shtetit serb për shkak të nënshkrimeve nacionaliste?

Ka një kohë të gjatë që Ministria e Integrimeve Evropiane ka ngelur pa ministër, në kohën kur ne e kemi zgjedhur rrugën e integrimeve evropiane dhe kur tash në këtë seancë do të miratohet agjenda për reforma evropiane, e ku janë ndarë detyrat dhe përgjegjësitë, e ka qenë vërejtje edhe e Bashkimit Evropian dhe kush do ta përmbushë gjithë këtë agjendë, sepse edhe në Bruksel kur kemi qenë kanë thënë se nuk po ka njerëz të duhur, të cilët lobojnë për proceset e integrimit evropian dhe për anëtarësim në organizata të ndryshme ndërkombëtare. \

Pse po zvarritet kjo punë dhe kur do të zgjidhet ministri i Integrimeve Evropiane?