A mund të na tregoni se sa ndërhyrje kirurgjike janë bërë në Klinikën e Kardiologjisë Vaskulare përgjatë viteve 2011 deri 2014? Pastaj, sa ndërhyrje kirurgjike janë bërë në ato investime të mëdha në Klinikën e Kardiokirurgjisë? Sa mjete janë investuar dhe sa pacientë janë trajtuar për këtë shërim jashtë institucioneve publike me paratë e Ministrisë të Shëndetësisë? Sa koronografi janë kryer, sa stenda dhe sa ... janë vendosur në Klinikën e Kardiologjisë, përkatësisht në Kardiologjinë Invazive gjatë viteve 2011-2014 dhe sa mjete janë shpenzuar për ofrimin e këtyre shërbimeve për pacientë jashtë institucioneve publike?

Sipas standardeve të përcaktuara nga Organizata Botërore e Shëndetit, ngarkesa fizike tek fëmijët nuk guxon të kalojë 10% e peshës trupore të fëmijët dhe pyetja është, i nderuar ministër: Pesha e çantave të nxënësve të shkollave po bëhet një problem mjaft serioz për shëndetin e fëmijëve dhe deri tani është folurshumë për këtë problem, por që nuk ka pasur zgjidhje.
Cilat janë hapat konkret që Ministria e Arsimit ka ndërmarrë apo pritet të ndërmarrë për zgjedhjen efikase të këtij problemi? A keni kërkuar llogaridhënie nga Drejtoria përkatëse e arsimit parauniversitar sa i përket të hartimit të korikulës, pse duhet fëmijët për ta bartur një tekst nga shtatori për ta mësuar në qershor, pse ngarkohet kjo edhe kjo po i bënë këto probleme të cilat janë deri me tani dhe a është menduar me anën e korikulës së re që këto probleme të evitohen?

Por unë dua ta ngrit një çështje të cilën e kam ngrit edhe në vitin 2013, në Kuvend për cilësinë e barërave apo më mirë me thanë jo cilësinë e barërave, gjegjësisht për falsifikimin dhe kontrabandimin e barërave. Sipas Agjencisë për Produkte Medicinale, në atë kohë, një profesor universitar i Departamentit të Farmacisë, Azem Lajqi, pronar i Kompanisë Lega-Med po prodhonte barëra pa licencë, po falsifikonte barëra dhe ai edhe publikisht e kishte pranuar se ka punuar në kundërshtim me ligjin. Gjithashtu në disa raste nga Policia e Kosovës janë zënë kontrabandues të barërave të cilët ka futur ilegalisht në Kosovë barëra dhe produkte të tjera medicinale. Në këtë periudhë kohore kryeinspektori i AKPM-së kishte filluar një veprim të gjerë të kontrollit në tërë Kosovën, ku të gjithë po shpresonin se më në fund ky sektor po mbikëqyret nga institucionet përgjegjëse shëndetësore. Ushtruesi i AKPM-së suspendoi nga puna kryeinspektorin e farmaceutikë zoti Basri Rexha. Pas suspendimit të kryeinspektorit Basri Rexha, ky sektor sërish u kthye në rutinën e falsifikimit dhe kontrabandimit. Prandaj, edhe sot kemi këtu raporte në media për nivelin e lartë të falsifikimit të barërave që është shumë shqetësuese për arsye se këto barëra po konsumohen nga pacientët tanë të cilët kërkojnë shërim përmes tyre.
Pyetja ime ishte për ministrin, se a ka marrë Ministria ndonjë hapë në këtë drejtim dhe a ka kërkuar ndonjë raport nga Agjencia për Produkte Medicinale?

Sipas Ligjit të shëndetësisë, neni 15, pika 1, kujdesi shëndetësor organizohet dhe zbatohet në tri nivele. Qytetarët e komunave Prishtinë, Podujevë, Obiliq, Fushë-Kosovë, Lipjan dhe Drenas nuk kanë se ku ta marrin kujdesin dytësor. Pacientët e këtyre komunave nga kujdesi primar referohen drejtpërdrejt në kujdesin terciar. Tani pas themelimit të SHSKUK-së, as këtë shërbim nuk e marrin në institucionet e lexuara, sepse QKUK-ja tani e disa muaj është shuar së ekzistuari me dokumente. Shërbimi spitalor dhe klinik universitar i Kosovës, rregullohet me Ligj të shëndetësisë nga neni 62 deri në nenin 69. Sipas Ligjit të shëndetësisë, i miratuar me 13 dhjetor 2012, ekzistimi dhe funksionimi i QKUK është i siguruar me nenet 17, pika 4.1; neni 21 dhe neni 64, pika 3.1. Bazuar në shkresat zyrtar të SHSKUKU, tani disa muaj praktikisht dhe juridikisht është shuar QKUK-ja. 
Pyetja është, i nderuar: Në cilin institucion të licencuar nga Ministria e Shëndetësisë qytetarët mund t’i marrin shërbimet e kujdesit tretësor shëndetësor, pasi që institucioni i licencuar QKUK është shuar, ndërsa SHSKUK-ja është organ menaxhues që përbëhet nga sektori dytësor dhe tretësor. Nuk është klinikë, prandaj as nuk ka aplikuar, as që ka licencë për operim si klinikë terciare. Ku mbeti QKUK-ja? Nëse ekziston, atëherë kush është menaxhmenti i saj? Nëse nuk ekziston, kush e ka shuar dhe në bazë të cilit ligj dhe kur pritet që qytetarët e komunave Prishtinë, Podujevë, Obiliq, Fushë-Kosovë, Lipjan dhe Drenas të kenë të organizuar shërbimin e kujdesit dytësor?
Kjo është një letër-qarkore që e ka dërguar drejtori i përgjithshëm i QKUK-së, me të cilën e ndalon përdorimin e logos të QKUK-së dhe favorizon apo sugjeron që të përdoret logoja e SHSKUK-së. Me Ligjin e shëndetësisë funksionimi i QKUK-së është i garantuar me nenin 17 pika 4, prandaj cila është e drejta ligjore të shuhet një institucion i tillë terciar? 

Rastet abuzive, shkelja dhe pasiguria në punë janë bërë edhe në Agjencinë Kosovar të Privatizimit, që është themeluar nga Kuvendi i Kosovës dhe ndërmarrjet shoqërore që menaxhohen nga AKP-ja dhe ato të privatizuar nga AKP-ja.
Pyetja për ministrin ishte: Sa inspektime e monitorime ka bërë Inspektorati i Punës në Agjencinë Kosovare të Privatizimit dhe në ndërmarrjet shoqërore që ka në menaxhim AKP-ja dhe ato që i ka privatizuar? Cilat janë të gjeturat e Inspektoratit të Punës në ndërmarrjet shoqërore që menaxhohen nga AKP-ja dhe cilat masa janë ndërmarrë? Sa po respektohen dhe zbatohen vendimet e Inspektoratit të Punës në zbatimin e të drejtave të punëtorëve kur kemi raste të shkeljeve nga punëdhënësit? Çfarë veprimesh janë ndërmarrë për zbatimin e vendimeve të Inspektorit të Punës? AKP-ja, siç quhen të dhënat e deritanishme, punëtorët e fabrikës së punëtorëve të Fabrikës së Llamarinës “Lamkos” në Vushtrri, apo ata të “Trepçës”, ku sjellja e menaxhmentit të AKP-së është një sjellje prej pashallarëve, ndërsa ajo e drejtorëve të këtyre ndërmarrjeve shoqërore dhe atyre të privatizuar prej bejlerëve, ndërsa punëtorët trajtohen si shegertë.

Me Ligjin e Buxhetit të Republikës së Kosovës për vitin 2015 janë paraparë investimet në kardiokirurgji dhe në muajin nëntor 2014 është nënshkruar marrëveshja ndërmjet Shërbimit  Spitalor Klinik Universitar të Kosovës dhe Qendrës Spitalore Klinike Universitare të Tiranës për ofrimin e shërbimeve kardiokirurgjie nga ekspertët të QSTU-së, në kuadër të shërbimit të
kardiokirurgjisë në Qendrën Klinike Universitare të Kosovës.
Dhe, gjashtë muaj pas nënshkrimit të kësaj marrëveshje qytetarët nuk arrijnë që këtë shërbim ta marrin institucionet publike. Ndërsa ju, i nderuar ministër, në seancën e Kuvendit të Kosovës dy javë më parë deklaruat se e keni formuar një këshill për kardiokirurgji dhe deklaruat se buxhetin e paraparë për kardiokirurgji nuk e keni shfrytëzuar qëllimisht deri më tani, sepse në rishikimet e buxhetit planifikoni ta destinoni në projekte të tjera. Mosfunksionalizimi i këtij shërbimi në bazë të asaj që deklaruat edhe ju dhe që dihet botërisht është në mungesë të kuadrit përkatës. A e dini se me ridestinim të këtyre mjeteve ju po i privoni pacientët tanë që këtë shërbim ta marrin në institucione publike. Më intereson të di kush ju bindi që të hiqni dorë nga ky projekt pasi që me rastin e miratimit të buxhetit për vitin 2015, ju e keni mbrojtur si projekt me vlerë dhe me rëndësi.
Prandaj, i nderuar ministër, ju pyes: Kur do të mund pacientët tanë ta marrin këtë shërbim në institucionet publike në Klinikën e Kardiokirurgjisë?

Me Ligjin për Buxhetin e Republikës së Kosovës për vitin 2015 janë paraparë investime në infrastrukturën sportive dhe, tani jemi në muajin e pestë dhe nuk po shohim se kanë filluar investimet në këtë fushë, në projektet e miratuara në Kuvend. Renovimi i Stadiumit Olimpik “Adem Jashari” në Mitrovicë, renovimi i Stadiumit të qytetit në Prishtinë dhe ndërtimi i Stadiumit kombëtar të futbollit.
I nderuar ministër, A mund të na tregoni në cilën fazë të zhvillimit janë projektet e lartshënuara dhe, pse ka ngecje në këtë drejtim?

Çështja ka të bëjë me mbrojtjen e punëtorëve në punë, që është një nga objektivat, edhe tuaja, edhe të Inspektoratit të Punës. Rastet e lëndimit në punë me pasoja tragjike kanë qenë të shpeshta, përdorimi i mjeteve mbrojtëse është detyrim, bashkë me masa tjera për sigurinë në punë. Para më shumë se një muaji u kam parashtruar pyetje parlamentare për shkeljen e të drejtave të punëtorëve, jo vetëm në sektorin privat, por me theks të veçantë për të drejtat e punëtorëve në sektorin publik dhe, në veçanti, te ndërmarrjet e privatizuara dhe ato shoqërore që janë nën menaxhimin e Agjencisë Kosovare të Privatizimit.
Muaj më parë, Inspektorati i Punës e ka inspektuar ndërmarrjen “Trepça”, që është nën menaxhimin e AKP-së. Në bazë të raportit të inspektimit të Inspektoratit të Punës në “Trepçë” është gjetur numër i madh i shkeljeve të Ligjit të punës.
Pyetja është, i nderuar ministër: a mund të na njoftoni në detaje për shkeljet ligjore që janë hasur në “Trepçë” gjatë inspektimit që ka bërë Inspektorati i Punës? A mund të na tregoni se të çfarë natyre kanë qenë këto të shkelje të gjetura në “Trepçë”? Cilat janë vendime të Inspektoratit të Punës pas këtij inspektimi? A janë ndërmarrë masa ndëshkimore për t’i evituar shkeljet në punë dhe shkeljet ligjore?

Çështja ka të bëjë se në bazë të Ligjit të shëndetësisë, neni 33, mjekësia sportive është organizuar në nivelin dytësor dhe tretësor, me qëllim të përkujdesit për gjendjen shëndetësore të sportistëve aktivë dhe qytetarëve që merren në mënyrë aktive me sport. Edhe me Ligjin për sport përcaktohet se personat të cilët në klube sportive aktivisht zhvillojnë veprimtari sportive janë të detyruar t’u nënshtrohen kontrolleve mjekësore sistematike gjatë kohës së pjesëmarrjes në veprimtarinë sportive. Kontrollin shëndetësor të pjesëmarrësve në veprimtarinë e kryen mjeku  specialist i mjekësisë sportive në Qendrën e Mjekësisë Sportive, të licencuar nga Ministria e Shëndetësisë, ku çdo sportist pastaj pajiset me kartelë mjekësore. Gjithashtu, përdorimi i substancave dhe metodave të ndaluara stimuluese, si dhe nxitja për përdorimin e tyre dënohet sipas normave ndërkombëtare, të pranuara nga federatat e sporteve përkatëse me aktet normative të tyre dhe për këtë arsye kontrollet mjekësore duhet të jenë profesionale dhe të kryhen në qendrat e licencuara sipas ligjit. Deri më tani, një qendër është e licencuar sipas ligjit dhe ajo është Qendra e Mjekësisë Sportive te Pallati i Rinisë.
I nderuar, ministër, a jeni i informuar se Komiteti Olimpik i Kosovës nuk është duke i kryer kontrollet mjekësore për sportistët kulminantë sipas Ligjit për shëndetësi dhe Ligjit për sport? Si është e mundur që klubet dhe federata sportive t’i kryejnë kontrollet mjekësore sipas ligjit, ndërsa Komiteti Olimpik jo dhe planifikon që këta sportistë t’i dërgojë në lojërat olimpike pa kontrollime mjekësore. Asnjë mjek nuk do të jetë me sportistët tanë në lojërat olimpike në Baku. Pyetja është: A e ke pyetur kryetarin e Komitetit Olimpik se ku po mendojnë që po shkojnë këta? A janë duke shkuar për ta përfaqësuar Kosovën atje? Kush përkujdeset për shëndetin e këtyre sportistëve, apo janë duke shkuar për të bërë vizita qejfi? 

Lidhur me keqmenaxhimin e fondeve te kombinatit Trepca. Derisa ne kemi pritur që Qeveria bashkë me AKP-në dhe Trepçën të na sjellin për shqyrtim strategjinë dhe Ligjin për “Trepçën”, menaxhmenti i saj ka shfrytëzuar mungesën e bordit të AKP-së për të zhvatur fondet e parapara për projekte zhvillimore të “Trepçës”. A e dini me cilin vendim u ridestinuan mjetet nga xhirollogaria e veçantë dhe sa para nga kjo sa para nga kjo llogari janë shfrytëzuar dhe abuzuar kundërligjshëm nga menaxheri i “Trepçës” dhe ushtruesi i detyrës të zëvendësdrejtorit të AKP-së. Bordi i AK-së nuk është funksional nga data 1 shtator 2014, atëherë me vendim të kujt është duke u shfrytëzuar “Trepça”, këta tre muajt e fundit në fondet e AKP-së nga llogaria e veçantë. Bazuar në Ligjin e AKP-së vendimet e bordit të AKP-së janë në fuqi dhe ato mund të shfuqizohen vetëm nga organi që ka vendos për to. Prandaj, pyes a janë në fuqi vendimet e Bordit të AKP-së, nëse janë shfuqizuar këto vende, kush dhe kur i ka shfrytëzuar sepse bord të AKP-së nuk ka. Sa para janë marrë nga fondi i ngrirë, llogari e veçantë e AKP-së për paga dhe mëditje dhe benifite të menaxherit dhe menaxhmentit “Trepçës” në skuadrën e shpëtimit?

Kuvendi i Kosovës në prill të vitit 2013 ka votuar Ligjin për kontrollin e duhanit, me synim të mbrojtjes së shëndetit publik, të gjeneratave të tashme, pasoja shkatërruese shëndetësore, sociale, ekonomike dhe mjedisore, konsumimit të duhanit dhe ekspozimit ndaj tymit. Me ligjin nr. 04/L-156 përcaktohen masat për ndalimin, kufizimin e përdorimit të produkteve të duhanit, përbërësve të duhanit, parandalimin e pasojave të dëmshme nga përdorimi i produkteve të duhanit dhe mbikëqyrjen për zbatimin e ligjit. Pasi që Ministria e Shëndetësisë ka qenë sponsorizuese, pyetja ime ka qenë se sa janë të kënaqur Ministria e Shëndetësisë me zbatimin e këtij ligji, sepse atë që po e shohim në përditshmërinë tonë, ky ligj po shkelet përditë, në veçanti në periudhën dimërore dhe në periudha kohore më të ftohta. Dhe, thënë të drejtën, në bazë ajo çka po shohim në zbatimin e këtij ligji, këtij ligj mund edhe t’i ndërrohet emri dhe të quhet Ligji për kontrollin e taketukes së duhanit për arsye, se me këtë ligj vetëm është ndaluar përdorimi i taketukes së duhanit nëpër lokale, por jo edhe i duhanit. Kështu që, ose do të duhej të fillohet një iniciativë për ndryshimin e ligjit dhe të adaptohet ky ligj konform nevojave të cilat janë të përditshme, ose vërtet duhet t’i ndërrohet emri ligjit dhe të quhet Ligji për kontrollin për ndalimin e tablles së duhanit nëpër lokale?

Më 29 prill Ministria e Shëndetësisë ka mbajtur takimin e parë të Këshillit Profesional për funksionalizimin e shërbimeve të kardiokirurgjisë në Qendrën Klinike Universitare të Kosovës, jemi informuar me vendimin tuaj. Më rastin e fillimit të këtij këshilli, i nderuar ministër, patët deklaruar se ky këshill ka për qëllim të funksionalizojë shërbimin e kardiokirurgjisë dhe do të sigurojë shërbim 24 orësh nga kardiokirurgjia për qytetarët e vendit. Kjo është deklarata juaj, prandaj i nderuar ministër, më intereson cilat veprime janë ndërmarrë deri tani brenda këtyre pesë muajve, a është analizuar situata, cili është plani i punës, plani i veprimit dhe të tjera, sa i përket fushës së kardiokirurgjisë. Dhe, më intereson shumë të di, i nderuar ministër, prej fillimit të punës së këtij këshilli është ndërprerë puna në kardiokirurgji, ndërsa ka qenë një ofertë publike e Spitalit “International Medicine Hospital”, që t’u ofrojë për tri ndërhyrje brenda javës stafin e tyre pa pagesë dhe kjo nuk është pranuar dhe nuk është dhënë as përgjigje publike e as me shkrim, ndërsa në të njëjtën kohë janë adresuar qytetarët në “International Medicine Hospital”, që të bëhen ndërhyrjet kardiokirurgjike me paratë e taksapaguesve tanë. Do të thotë, brenda kësaj periudhe kohore keni refuzuar diçka pa pagesë, ndërsa keni dërguar një ditë në spital shërbime me pagesë. Më intereson të di, i nderuar ministër, pyetja është, kur mund të presin qytetarët e Kosovës që ky shërbim të funksionalizohet 24 orë?
 Mirëpo, çështja është se gjithashtu në këtë sektor te kardiologjia invazive muajin e kaluar është prishur edhe koronografi, më intereson të di nëse jeni informuar për këtë dhe cilat kanë qenë arsyet, për arsye se ai që ka qenë publik nga zyrtarët e Ministrisë së Shëndetësisë, që koronarografi është prishur për shkak se ka punuar shumë më shumë se sa viteve tjera, nuk është e vërtetë, për arsye se numri i ndërhyrjeve në kardiologjinë invazive është i njëjtë edhe me vitet paraprake 2014 dhe 2013, vetëmve atëherë nuk është prishur koronarografi dhe këto pacientë nuk janë adresuar në sektorin privat, shpeshherë për interesa të individëve brenda këtij sektori.

Në fillim të vitit 2015, takimin që e kemi mbajtur së bashku me Komisionin për Arsim, Kulturë, Rini dhe Sport, bazuar edhe në rekomandimet e Kuvendit të Kosovës e kemi aprovuar agjendën legjislative ku ka qenë e planifikuar që në sesionin e parë pranveror miratimi dhe dërgimi, sjellja nga ju e Projektligjit për sponsorizim, Projektligji për objektet sportive dhe menaxhimin e tyre dhe Projektligji kundër organizimit dhe dukurive tjera negative në sport, por deri më tani nuk kan ardhur, me përjashtim që këto ditë ka arritur Ligji kundër huliganizmit. Gjithashtu në muajin mars 2014 Qeveria ka vendosur për ndërtimin e Stadiumit Kombëtar prej 25 mijë deri 30 mijë ulëse. Në buxhetin e vitit 2015 janë ndarë mjetet për financimin e këtij projekti, mirëpo deri më tani punët për këtë stadium kanë ngecur dhe siç shihet që edhe në vitin 2016 do të kemi ngecje në këtë projekt. Shqetësuese është edhe ngecja në projektet tjera infrastrukturore, projekti i shtigjeve të atletikës dhe sistemi i ujitjes në Mitrovicë, më duket se nuk do të përfundojë as në këtë vit dhe sigurisht që as vendosja e reflektorëve nuk do të bëhet, edhe pse kanë qenë të planifikuara, buxheti i këtyre reflektorëve do të shkojë në suficit dhe kjo është shumë shqetësuese për arsye se Stadiumi i Mitrovicës nuk do të jetë i gatshëm për gara ndërkombëtare dhe kur ta kemi parasysh që ministria vitin e ardhshëm bashkë me Komunën do t’i fillojë edhe investimet në Stadiumin e Prishtinës dhe në pranverë do të kemi ndërtime, punime në Stadiumin e Qytetit në Prishtinë, atëherë kjo mbetet shumë shqetësuese. I nderuar ministër, kur pritet që viti 2016 të jetë vit i futbollit dhe i shpërthimit në arenën ndërkombëtare, këto ngecje që i ka bërë Ministria e Kulturës, Rinisë dhe Sportit, atëherë seriozisht rrezikohet mbarëvajtja e këtyre garave ndërkombëtare. Prandaj, kërkoj nga ju që të jepni një sqarim lidhur me këtë.

Sipas Ligjit për odat shëndetësore, i miratuar më 3 maj 2013, janë formuar Oda e mjekëve, stomatologëve, farmacistëve, fizioterapeutëve, infermierëve dhe mamive dhe profesioneve tjera shëndetësorë. Themelimi dhe konstituimi i odave shëndetësore tani është punë e kryer, por përkundër kësaj Ministria e Shëndetësisë nuk ka filluar bartjen e kompetencave te oda sipas ligjit, me çka profesionistëve shëndetësorë do t’u sigurojë pavarësia profesionale dhe qeverisja, e kjo do të mundësonte përmirësimin e cilësisë së kujdesit shëndetësor. Përgjithësisht në nenin 9 dhe 10 të Ligjit janë paraparë kompetencat e odave, të cilat do të duhej të barteshin nga Ministria e Shëndetësisë tek oda. Gjithashtu, ministria ka qenë e obliguar që një pjesë e stafit administrativ ta bartë tek oda me qëllim të mbarëvajtjes së punës së odave për profesionistët shëndetësorë dhe funksionalizimin e tyre. Sipas nenit 38 të këtij ligji, mjetet për themelimin dhe funksionimin e odës sigurohen nga buxheti i Republikës së Kosovës për fazën kalimtare trevjeçare, mjete të realizuara nga anëtarësia, taksa licencimi dhe ri-licencimi. Mirëpo, deri më tani kjo nuk ka ndodhur nga ministria dhe ka një ngecje për mbarëvajtjen e punës së themelimit të odave. Kryetarët e odave të zgjedhura ende nuk paguhen dhe nuk e kemi një konstituim të mirëfilltë të tyre. Prandaj, i nderuar ministër, pyetja është: Kur do të përfundojë konstituimi i odave të profesionistëve shëndetësorë dhe kur Ministria e Shëndetësisë do t’i bartë kompetencat e parapara sipas Ligjit për odat e profesionistëve shëndetësorë? A mund të na njoftoni nëse Ministria e Shëndetësisë është duke i grumbulluar mjetet për funksionimin e odave sipas Ligjit për odat e profesionistëve shëndetësorë dhe kur pritet që ju t’i siguroni kushtet elementare për punë dhe udhëheqje të odave të profesionistëve shëndetësorë.

(Pyetje me shkrim)

Pasi qe Stadiumi i Prishtines ndodhet ne renovim, Stadiumi Adem Jashari nuk ka perfunduar, stadiumi nacional nuk ka filluar, pyetja eshte: Ne shtator te ketij viti kur FFK pritet te luaj lojet kualifikuese per Kampionatin Boterore, ku do te luhen keto loje? 

Pyetja ime ka të bëjë me ratifikimin e 3 marrëveshjeve për financimin e rrugës Prishtinë- Mitrovicë, rruga M2, pra Marrëveshja financiare e lidhur në mes të Republikës së Kosovës dhe Bankës Islamike për Zhvillim e Financim dhe vazhdim të ndërtimit të rrugës M2, e votuar në Kuvendin e Kosovës më datë 31. 7. 2013; 21 Marrëveshja për hua, e lidhur ndërmjet Republikës së Kosovës dhe Fondit Saudit për Zhvillim dhe për financimin e vazhdimit të rrugës M2, e votuar në Kuvendin e Kosovës më 5.12. 2013; Marrëveshja për hua, e lidhur ndërmjet Republikës së Kosovës dhe fondit OPEK për Zhvillim Ndërkombëtar për financimin dhe vazhdimin e ndërtimit të rrugës M2, e votuar më 27. 2. 2014. Greis periudha për të 3 marrëveshjet për financimin e rrugës M2 është 5 vjet dhe po kalojnë 3 vjet nga miratimi i marrëveshjes së parë, ndërsa punët në rrugën Prishtinë-Mitrovicë nuk kanë filluar. Pyetja ka qenë për kryeministrin, e bazuar si udhëheqës dhe bartës i përgjegjësive. Pra, përse ende nuk kanë filluar punimet në rrugën M2, kur fondet për investime janë siguruar dhe marrëveshja e fundit është miratuar më 27. 2. 2014? Prandaj, në cilën fazë jemi për fillimin e investimeve në rrugën Prishtinë-Mitrovicë, sepse së shpejti do të fillojmë t’i paguajmë këstet e marrëveshjes së miratuar, ndërsa punimet ende nuk kanë filluar.

Është e njëjta çështje që unë tani e katër vjet e ngre në Kuvend, është problemi i çantave të stërngarkuara të fëmijëve dhe që ka shkaktuar probleme serioze në shëndetin e fëmijëve. Sipas hulumtimeve afër 40% e nxënësve kanë disbalancë muskulore për shkak të peshës së rëndë të çantave dhe qëndrimit apo posturës së keqe, kanë devijime të shtyllës kurrizore, që paraqet problem shqetësues për shëndetin e fëmijëve tanë. Këtë problem unë tani e katër vjet e ngre këtu në Kuvend, edhe pse në fillimin e vitit të kaluar shkollor, kur ia kam parashtruar këtë pyetje ministrit të Arsimit, zoti Arsim Bajrami ka premtuar do të zgjidhet dhe ajo çka kemi parë deri në përgatitje të tashme të fillimit të këtij viti shkollor duket se nuk ka ndonjë interesim që ky problem të zgjidhet, është pothuaj se pesha e njëjtë e çantave për të gjitha klasat, prandaj kërkoj edhe një herë nga Ministria e Arsimit që vërtet ta trajtojë këtë problem, dhe jo vetëm Ministria e Arsimit, por edhe drejtoritë e arsimit nëpër komuna, të cilat kanë për obligim ta zgjidhin këtë problem, për arsye se ky është një problem shumë serioz i fëmijëve tanë.

(Pyetje me shkrim për përgjigjje me gojë)

Qeveria e Kosovës dhe Doganat e Kosovës kanë  bërë marrëveshje bashkëpunimi me Qeverinë dhe Doganat e Shqipërisë për tregti të lirë dhe letësira doganore.

A mund të na e sqaroni përse duhet qytetarët të paguajn transitin, shpedicionin dhe skanerin në Shqipëri, kur malli ka për destinacion Kosovën. 

(Pyetje me shkrim për përgjigjje me gojë)

Pasiqë përmes projektbuxhetit të vitit 2016 SHSKUK-së i’a keni marrë buxhetin dhe e keni kaluar në AFSH. Sa e ndjeni vetën përgjegjës për mungesat e krijuara në furnizim me barna dhe ushqim për pacientë? 

Çështja ka të bëjë që Qeveria e Kosovës dhe Doganat e Kosovës kanë bërë marrëveshje bashkëpunimi me Qeverinë e Shqipërisë dhe Doganat e Shqipërisë për tregti të lirë dhe lehtësi doganore. Ka pasur disa paraqitje publike dhe proklamime sa u përket marrëveshjeve me Republikën e Shqipërisë, por përkundër kësaj, qytetarët tanë, të cilët kalojnë transit nëpër Republikën e Shqipërisë me mall apo automjete që kanë për ta zhdoganuar në Republikën e Kosovës detyrohen të paguajnë për kalim transit nëpër Shqipëri shpedicionin dhe skanerin. Qytetarët tanë paguajnë për skaner në doganë 5 euro për mall në vlerën prej 1 000 euro dhe 22 euro për mall në vlerën mbi 1 000 euro, shërbim të cilin e paguajnë, por nuk e marrin. Në fakt, është vetëm si gjobë për qytetarët tanë. Gjithashtu, në pagesën e transitit dhe shpedicionit qytetarëve tanë u vështirësohet kalimi nëpër Shqipëri në raport me vendet e tjera fqinja, kur destinacioni i mallit për zhdoganim është Kosova. Pyetja është si vijon:

A mund të na sqaroni përse qytetarët tanë duhet ta paguajnë transitin, shpedicionin dhe skanerin në Shqipëri, kur malli ka për destinacion Kosovën dhe janë bërë aq shumë proklamime sa u përket lehtësive ndërmjet dy qeverive tona dhe Doganave të Kosovës e Doganave të Shqipërisë?

Një pyetje i drejtohet ministrit Rrahmani: Gjendja në Shëndetësinë e Kosovës vazhdon të jetë e rënduar, përveç mungesave të furnizimeve me barëra, tani janë paraqitur mungesa në furnizimet me ushqim. Deri më tani ka pasur vështirësi me barëra, por falë ndërhyrjes së ministrit, meqë i është marrë buxheti Qendrës Klinike Universitare dhe spitaleve rajonale, tani pacientët dhe spitalet kanë vështirësi që të furnizojnë pacientët edhe me ushqim. Me keq nuk ka se ku shkon! Prandaj, e pyes zotin Rrahmani se me projektbuxhetin e vitit 2016 dhe me atë të vitit 2017 tani ia ka marrë buxhetin SHSKUK-së dhe e ka kaluar në kuadër të Ministrisë së Shëndetësisë dhe AFSH-së, dhe e pyes për këto mungesa në barëra dhe ushqime se sa e ndien veten përgjegjës dhe duke e ndier veten përgjegjës sigurisht që as nuk mund të vijë që të paraqitet në Kuvendin e Republikës së Kosovës para qytetarëve dhe deputetëve.