Çështja është konkrete, është shkatërrimi i ambientit në Grykën e Deçanit, si rrjedhojë e fillimit të ndërtimit të tri hidrocentraleve nga kompania fituese e cila me të madhe ka degraduar shtratin e lumit Lumëbardhë, apo siç njihet në popull Bistrica e Deçanit, duke e larguar masën drunore përgjatë këtij lumi dhe duke krijuar zona erozive si dhe eksploatuar me mijëra metra kub rërë dhe zhavorr, e cila ka bërë që shtrati i këtij lumi të humbë naturalitetin e vet që posedon. Unë kam menduar se sot do të vjen ministri dhe do të përgjigjet. Nuk e di ky personalisht a është në dijeni dhe a kanë filluar ndonjë masë preventive sipas ligjeve dhe kontratës me këtë operator dhe ky është një shqetësim i vazhdueshëm i banorëve të qytetit të Deçanit, për shkatërrimin ekëtij ambienti para syve të institucioneve lokale dhe qendrore.

Pyetja për ministrin Avdullah Hoti ka të bëjë po ashtu me mbrojtje të ambientit dhe që ka të bëjë me regjistrimin e automjeteve i cili i paraprinë një taksë për mbrojtjen e mjedisit në Republikën e Kosovës. Asnjëherë nuk është thënë se ekziston një fond i tillë, ku shkon ky fond, si shfrytëzohet dhe si u rikthehet qytetarëve të vendit për mbrojtjen e atyre qëllimeve që ne mendojmë se është dashur të menaxhohet një bord i veçantë, i cili do t’i dedikonte këto të holla për shërim të qytetarëve të sëmurë si pasojë e ndotjes së ambientit, pastaj për pajisjen e laboratorëve të cilët e monitorojnë ndotjen e ambientit. Gjithashtu nga ky fond do të duhej të bëhej blerja e barnave për familjet në asistencë sociale, arsimimin e kuadrove për mbrojtjen e mjedisit, organizimin e konferencave, simpoziumeve për ruajtjen e mjedisit, vetëdijesimin e qytetarëve për mjedis të pastër si dhe për projekte të ndryshme mjedisore.