Sot në Kosovë ekzistojnë 6 universitete publike, të cilat ofrojnë kryesisht programe të ngjashme të studimit. Për dallim nga universitetet tjera, themelimi i Universitetit të Shkencave të Aplikuara të Kosovës në Ferizaj, do t’i kontribuonte shumë zhvillimit industrial të regjionit të Ferizajt dhe Kosovës në përgjithësi, duke nxjerrë kuadro profesionale të profesionalizuara dhe profilizuara në shkencat e aplikuara, të gatshëm për tregun e punës. Me themelimin e këtij universiteti do të përfitonin studentë nga komunat, të cilat gravitojnë me Ferizajn, siç janë Lipjani, Shtimja, Kaçaniku, Vitia, Hani i Elezit, Shtërpca dhe Kllokoti. Universiteti i Shkencave të Aplikuara të Kosovës do të ishte institucioni i vetëm i arsimit të lartë në fushën e shkencave të aplikuara në rajon, modern dhe atraktiv për studentët. 
Pyetja është kështu: duke e ditur rëndësinë e themelimit të këtij universiteti, çfarë keni bërë ju si ministër lidhur me këtë çështje? Cilat janë veprimet konkrete nga ana juaj, për themelimin e këtij universiteti dhe me çfarë shpejtësie mendoni të lëvizni në këtë drejtim? 

Çështja është - ndërtimi i Spitalit Regjional të Ferizajt.
Qeveria e Republikës së Kosovës dhe Ministria e Shëndetësisë, në rishikimin e buxhetit të vitit 2013, kishin ndarë mjete për fillimin e ndërtimit të Spitalit regjional të Ferizajt. Gjithashtu është premtuar edhe nga Qeveria e Urdhrit të Kalorësve të Maltës, se do të investojë në këtë projekt, në vlerë prej 35 milionë euro. Ky spital është i rëndësisë së veçantë, përveç aspektit historik, është i domosdoshëm për regjionin e Ferizajt, i cili ka mbi 250 mijë banorë rezidentë, si dhe për banorët e qytetareve të tjera që janë në regjionin e Ferizajt.
Dhe, pyetja është kështu, i nderuar zoti ministër Rrahmani: Çfarë keni ndërmarrë ju si ministër për këtë çështje, kur do të fillojnë punimet për ndërtimin e këtij spitali dhe a është paraqitur ndonjë pengesë, që nuk mund të tejkalohet për fillimin e ndërtimit të këtij spitali?

Çështja është rreth Hidro-sistemit të Lepencit, gjegjësisht Ibër-Lepencit, por është çështja për Lepencin. Edhe ministri sigurisht, definitivisht është i gatshëm dhe sigurisht është interesuar për ta dëgjuar këtë pyetje dhe për të bashkëpunuar së bashku. Projekti i Ibër-Lepencit është projektuar në fund të viteve të ‘60-ta, ndërsa punimet për ndërtimin e tij kanë filluar në vitin 1970, kur në atë kohë është ndërtuar vetëm pjesa e Ibrit, ndërsa pjesa e Lepencit ekziston vetëm si projekt ideor, dhe jo vetëm ideor, por është projekt i cili nuk ka filluar ende së realizuari. Lepenci është një projekt sipas propozimit të studimit të Bankës Botërore nëpërmjet të cilit do të mundësohet një menaxhim i mirë i ujërave të Kosovës Juglindore, me qëllim të zhvillimit të sektorit të bujqësisë, ekonomisë dhe përgjithësisht të gjithë regjionit. Ky projekt do të mundësonte lidhjen e Ibrit me Lepencin, nëpërmjet dy kanaleve kryesore që shtrihen në Rrafshin e Kosovës. Me anë të këtij projekti do të mundësohej furnizimi me ujë të pijes për 500 mijë banorë dhe të qytetit, si për Ferizajn, Shtimen, Lipjanin, Graçanicën, Obiliqin, Fushë- Kosovën dhe Prishtinën, si mundësi rezervë. Projekti i Lepencit do të mundësonte ujë për industri, ujë për ujitje për 40 mijë hektarë të tokës bujqësore, menaxhimin e të gjitha prurjeve të ujërave në pjesën Juglindore të Kosovës, ku përfshihen lumenjtë Lepenci, Nerodimja dhe Shtimjanka, gjenerim të energjisë elektrike mbi 10 18 megavat nga hidrocentrali që planifikohet të ndërtohet, mbrojtjen e ambientit dhe mbrojtjen nga vërshimet.