Unë do t’i citoj pjesët e një letre të datës 24 maj 2014, ku ish- ministri Bajram Rexhepi i drejtohet drejtorit të përgjithshëm të Policisë së Kosovës, citoj: “Siç jeni të informuar, Qeveria e Republikës së Turqisë, është duke mbështetur institucionet e Republikës së Kosovës në forcimin e kapaciteteve njerëzore dhe institucionale në fushën e sigurisë. Nga takimi që kam pasur me
delegacionin e Këshillit të Sigurisë së Republikës së Turqisë, më është kumtuar shqetësimi i tyre për mos inkuadrimin e kadetëve të shkolluar me financimin dhe përkrahjen e tyre në institucionet arsimore në Republikën e Turqisë, andaj si institucione do të tregojmë se jemi partnerë seriozë.” përfundon citati. E lexova këtë, për ta kuptuar të gjithë, sepse ata kanë qenë të vetëdijshëm se kjo çështje kërkon zgjidhje. Deri më tani, Ministria e Punëve të Brendshme nuk i është përmbajtur kontratës. Çfarë do të ndodhë me këta kadetë?  A do të mbesin edhe më tutje jashtë institucioneve apo do të sistemohen në bazë të kontratës së nënshkruar, sepse po të mos ishte ajo kontratë e nënshkruar, nuk besoj se do të kishte pasur interesim nga ata kadetë, që të vazhdojnë për pesë vjet me radhë studimet në Republikën e Turqisë, në fushën profesionale të caktuar dhe që të mos ketë kurrfarë garancie?