Zoti ministër, më 22 shkurt, në rrugën nacionale në komunën e Shtërpcës persona të nacionalitetit serbë me arsyetimin se po bëjnë festë nacionale kanë dalë për disa orë në këtë aks rrugor dhe të maskuar u kanë kërkuar të holla udhëtarëve nëpër vetura dhe autobusë. Për ta hapur rrugën, ata jo vetëm se e kanë penguar qarkullimin e lirë shumë qytetarëve, por të maskuar kanë shkaktuar panik ndaj qytetarëve që udhëtonin për qendrat turistike të Prevallës e  Brezovicës, gjatë tërë kohës, asnjëherë të prekur prej Policisë së Kosovës, derisa në protestën e 27 janarit u rrahën brutalisht, e madje edhe u sulmuan me plumba gome protestuesit paqësorë pa maska vetëm pse kishin dalë ta ushtrojnë të drejtën e tyre demokratike për të protestuar.
Pyetja ime për ministrin është: A mund të na tregoni se çka nënkupton plani operativ i Policisë së Kosovës, për çka dhe pse është toleruar bllokimi i rrugës dhe kërkimi i të hollave për lejimin e kalimit me njerëz, të cilët kishin maska. Dhe po më intereson, nuk po kuptohet asnjëherë qartë se kur po ndërhyn Policia, e kur jo. A i bie kjo që në protestat e ardhshme edhe ne duhet të veshim maska për të mos hëngër dajak?