Ministër, në takimin e mbajtur, ne si Komision i Bujqësisë, unë pata shfaqur shqetësimin në lidhje me prodhuesit ilegalë të farës dhe ata legalë, që kanë të licencuara farërat. Pyetja është: Sa jeni interesuar në këtë aspekt dhe sa jeni informuar me të dhënat e sakta apo informacione shtesë, sa i përket parandalimit të prodhimit të farës së grurit nga prodhuesit ilegalë, të palicencuara dhe që dihet botërisht se kanë lidhje të afërta me politikën? 

Unë kam një shqetësim me rrugën e Dushkajës, që përshkon përmes fshatrave Bec, Cermjan, Gergoc, Barbaniq, për të vazhduar kah fshatrat e Lugut të Baranit dhe fshatrat e Klinës, në vitin 2008 kjo rrugë është e njohur si rruga Bec-Jabllanicë, e cila është shtruar në vitin 2007-2008. Mirëmbajtjen e ka bërë Ministria e Transportit. Me ndërrimin e pushtetit lokal dhe atij qendror, kjo rrugë më nuk ka mirëmbajtje as dimërore as verore. Në këtë dimër, për tri ditë këto fshatra kanë qenë të izoluara, ka qenë e paraparë si rrugë regjionale, jo rrugë lokale.
Pyetja është: Çfarë do të ndërmerrni për mirëmbajtjen e kësaj rruge dhe a do të jetë në përkujdesjen e Ministrisë apo të komunës? 

Pyetja është për aeroportin e Gjakovës se që nga përfundimi i luftës në Kosovë deri në vitin 2014, ku edhe mori statusin e ndërmarrjes publike, ky aeroport administrohej nga KFOR-i italian. Aty janë bërë edhe miliona investime, sipas të gjitha informacioneve. Tani këto ditë është mbyllur totalisht ky aeroport, jam në dijeni se kryeministri, bashkë me ministrin e Financave,i ndan do para sa për rojat e objektit që të mos vidhet dhe të mos plaçkitet, sikur janë plaçkitur të gjitha objektet publike. Pyetja është kështu se çka do të bëjë Qeveria, apo çka do të ndërmarrë që ky aeroport të ketë një zgjidhje afatgjate?

Është çështja për policin, zotin Nehat Thaçi, i cili është arrestuar dhe akoma është aktuale. Ne çdo ditë nëpër medie dëgjojmë se do të lirohet sot, do të lirohet nesër. Do të dëshironim të na sqarojë ministri çka kanë vepruar, çfarë masash kanë ndërmarrë për lirimin e zotit Nehat Thaçi?

Pyetja është për ministrin e Transportit, për urën e Rakovinës. Këtë urë, ministër e keni ndaluar njëherë për transport, tokat janë dëmtuar, aty më nuk është duke u punuar, çka keni bërë në këtë drejtim?