Të reshurat e fundit të shiut në komunën e Gjilanit e kanë rritur shqetësimin e banorëve të fshatrave të kësaj komune, përkatësisht fshatrave Përlepnicë, Kmetoc, Dobrëçan, si dhe fshatit Ranillug, rreth sigurisë së digës në liqenin artificial të Përlepnicës, ku vlerësohet se të reshurat e fundit mund të kenë dëmtuar seriozisht qëndrueshmërinë e digës.
Pyetja ime për ministrin Agani është: Kur keni bërë për herë të fundit ekzaminimin e nivelit të sigurisë së kësaj dige dhe të na tregoni se cila është gjendja e saj, duke ditur se nga siguria e saj varet jeta e rreth 10 banorëve të kësaj ane?

Zoti ministër, në maj të vitit 2013 është miratuar Ligji për odat e profesionistëve shëndetësor, sipas të cilit ligj do të formoheshin 5 oda. Këto oda sipas ligjit, përveç rolit dhe kompetencave tjera që kanë në shëndetësi, promovohen dhe mbrojnë veprimtarinë e profesionistëve shëndetësorë në institucionet publike dhe private. Pyetja ime për ju zoti ministër është: A është formuar deri më tani ndonjë nga odat e profesionistëve shëndetësorë dhe nëse po, cilat janë formuar deri më tani? 

Ligji për pensione të financuara nga shteti është aprovuar nga Kuvendi në maj të vitit 2014. Mungesa e këtij ligji ka penguar që të nënshkruhen marrëveshjet bilaterale me shtetet evropiane, ku punojnë qytetarët tanë. Meqenëse unë e mora përgjigjen që ia dhatë kolegut tim pak më parë, se jeni në negociata me shtetin e Zvicrës për nënshkrim të marrëveshjes, më intereson ta di nëse jeni në negociata, apo planifikoni me ndonjë shtet tjetër t’i filloni negociatat për nënshkrimin e marrëveshjeve, sepse sa  u përket ligjeve, ka qenë ky ligj dhe Ligji për sigurime shëndetësore, të cilat janë aprovuar, por dua ta di a jeni në negociata me ndonjë shtet tjetër?

Pyetja ime është e lidhur me sigurimet shëndetësore. Kam dashur që ministri të na
informojë, se në një radiotelevizion është deklaruar më herët se nuk do të ketë sigurime shëndetësore deri në vitin 2017. Por, interesimi im dhe i qytetarëve është se cilat janë përgatitjet që po bëhen nga Agjencia Financiare e Shëndetësisë si paraardhëse e Fondit të Sigurimeve Shëndetësore, por meqenëse ministri nuk është këtu dhe nuk mund të marr përgjigje, do ta përsëris në seancën tjetër?

Procesi i regjistrimit të diasporës ka filluar në fund të vitit 2013 dhe akoma po vazhdon. Tashmë dihet që prej fillimit të këtij viti është shtuar intensiteti i punës nga ana e ministrisë suaj për këtë proces. Atë që unë dua ta di është si po e presin bashkatdhetarët procesin e regjistrimit të diasporës dhe a po zhvillohet sipas planifikimit ky proces? Sa mendoni se duhet ndonjë aktivitet shtesë për sensibilizim të regjistrimit të diasporës përveç këtyre punëve që po i bëni,sepse unë këto ditë kam has në bashkatdhetarë që pyesin dhe nuk kanë mjaftë qartësi për regjistrimin e tyre. Mendoj, a keni në plan ndonjë aktivitet shtesë?

Një lajm që me entuziazëm është pritur nga qytetarët e Anamoravës, por edhe të Luginës së Preshevës, është ndërtimi i autostradës Prishtinë-Gjilan-Dheu i Bardh. Me këtë rrugë, qytetarët e kësaj ane dhe të Luginës së Preshevës do ta kenë më afër kryeqendrën tonë, Prishtinën, dhe tani më padurim presin që kjo rrugë të fillojë së punuari. Pyetja ime për ju, zoti ministër, është: A mund të na njoftoni deri ku kanë shkuar procedurat në realizimin e këtij projekti dhe kur mund ta kemi këtë rrugë të përfunduar?

Zoti ministër, pa dashur të ceku edhe një herë rëndësinë e autostradës Prishtinë - Gjilan - Dheu i Bardhë, sepse tanimë dihet që përveç rëndësisë jetike për Anamoravën kjo autostradë e lidhë edhe Luginën e Preshevës me ne. Andaj, pyetja ime për ju është: A mund të na njoftoni se në cilën fazë është projekti i kësaj autostrade dhe cilët janë hapat tjerë që priten në vazhdim?

Komisioni Parlamentar për të Drejtat e Njeriut, Barazi Gjinore, Peticione dhe të Pagjeturit gjatë monitorimit të zbatimit të Ligjit për parandalimin e dhunës në familje dhe gjatë takimit me përfaqësuesit e strehimoreve ka ankesa se këto strehimore po rrezikojnë të mbyllen në mungesë të buxhetit. Zoti ministër, në raportin e Qeverisë, të miratuar në seancën e 25 majit, është thënë se tetë OJQ strehimore që ofrojnë shërbime për mbrojtjen e viktimave të dhunës në familje janë mbështetur me 350 mijë euro për vitin 2015. I nderuar ministër, Si është ndarë kjo shumë e mjeteve, cilat kanë qenë kriteret në ndarjen e këtyre mjeteve dhe a janë trajtuar njësoj të gjitha strehimoret

Në muajin qershor nga mediet u njoftuam, që Ministria e Shëndetësisë ka filluar rilicencimin e profesionistëve shëndetësorë. Licencimi dhe rilicencimi është një procedurë që konfirmon, se profesionistët shëndetësorë i plotësojnë kushtet për të ushtruar profesionin e tyre. Në Kosovë licencat për punëtorët shëndetësorë që nga viti 2006 janë vazhduar me një vendim të përbashkët nga Ministria e shëndetësisë, për të gjithë profesionistët shëndetësor. Zoti ministër, sa janë të informuar profesionistët shëndetësor për kushtet dhe kriteret që duhet t’i plotësojnë, për t’u rilicencuar?

Zoti ministër, duke iu falënderuar kërkesës së adresuar nga organizata “Hendikos” më 14. 11. 2016 Komisionit për të Drejtat e Njeriut, Barazi Gjinore, Persona të Pagjetur dhe Peticione rreth shqetësimit të tyre për Ligjin për statusin dhe të drejtat e personave paraplegjikë dhe tetraplegjikë, në muajin dhjetor ministri Abrashi pati premtuar fillimin e zbatimit të këtij ligji në janar të këtij viti. Zoti ministër, në buxhetin e vitit 2017 nuk është përfshirë Ligji 05/L-067 për statusin dhe të drejtat e personave paraplegjikë dhe tetraplegjikë, d.m.th. mjetet e nevojshme financiare për të filluar zbatimin e këtij ligji. Andaj, i nderuar ministër, kërkoj nga ju të na jepni përgjigjen se kur do të fillojë zbatimi i këtij ligji? Dhe, meqenëse ministri Abrashi nuk është këtu, nëse do, ministri i Financave mund të na përgjigjet: A i ka lejuar mjetet e nevojshme të ministrisë adekuate për zbatimin e këtij ligji?