Pyetja ime ka të bëjë me një serë rekomandimesh, që janë miratuar në këtë Kuvend të Republikës së Kosovës, më 1 mars të vitit 2012 dhe, këto rekomandime kanë të bëjnë me ngjarjet e 10 shkurtit të vitit 2007, me ç’rast disa njësi të Policisë së UNMIK-ut kanë shtënë mbi qytetarët paqësorë, të cilët po protestonin në një demonstratë, të thirrur nga Lëvizja “Vetëvendosje”. Dhe, pyetja ka qenë për zëvendëskryeministrin Thaçi, se ai e ka pasur obligim të merret më shumë me këtë punë. Çka ka bërë lidhur me ato rekomandime, të cilat janë miratuar në këtë Kuvend tash e dy vjet dhe e kanë marrë votën e shumicës së grupeve parlamentare, këtu?
Dhe tjetra, kjo do të shihet edhe në dritën e një vendimi shumë të rëndësishëm tash kohëve të fundit, para dhjetë ditësh paneli këshillëdhënës për të Drejtat e Njeriut i UNMIK-ut, që është vetë organ i UNMIK-ut, që merret me monitorimin e sjelljes së policëve të tyre apo të punëtorëve të tyre, që kanë punuar në administratën e UNMIK-ut, e ka marrë vendimin para dhjetë ditësh, një vendim me tri pika, dy prej të cilave janë shumë me rëndësi që UNMIK-u është përgjegjës, ata policë qysh janë sjell atë ditë, janë përgjegjës për mohimin e të së drejtës në jetë 36 të dy qytetarëve, protestues paqësor; dhe e dyta, që UNMIKU është përgjegjës për pengimin e zhvillimit të demonstratës paqësore nëpërmjet vendosjes së barrikadave dhe pengimit të njerëzve për të marrë pjesë në demonstratë paqësore. Pra, vetë UNMIK-u e ka marrë këtë vendim, që është një organ i tij paneli këshillëdhënës. Prandaj, të gjithë zyrtarët e Republikës së Kosovës, duke përfshirë edhe kryeministrin dhe zëvendëskryeministrin, duhet të bëjnë më shumë tash në këtë drejtim, sepse tash është shumë më lehët të kërkohet përgjegjësi, duke qenë se vetë UNMIK-u po e pranon këtë përgjegjësi se çka ka ndodhur atë ditë.