Çështja është e ngritur si shqetësim që në kohët e fundit vjen në lidhje me gradat apo titujt e fituar pas diplomimit në arsimin e lartë. Studentët të cilët kanë përfunduar studimet në sistemin katërvjeçar dhe studimet postdiplomike në arsimin e lartë dyvjeçar, po ashtu edhe studentët të cilët kanë përfunduar studimet në sistemin trevjeçar dhe studimet postdiplomike në sistemin dyvjeçar apo edhe njëvjeçar, nuk ka ndonjë dallim në këtë sistem që merren diplomat apo titujt
shkencorë për këta studentë- titulli është i njëjtë - master. Zoti ministër, a është specifikuar diku që titulli shkencor të dallojë nga sistemi 4+2 me studimet postdiplomike dhe të sistemi 3+2 apo edhe 4+1 dhe 3+1? Të gjithë këta studentë marrin gradën apo titullin e njëjtë. Për ndryshim nga ne, në vendet e ndryshme ne e dimë që marrin grada të ndryshme.
A jeni të informuar që në bordet e Ministrisë së Arsimit për shembull studentët apo ligjëruesit, të cilët i kanë përfunduar studimet katërvjeçare dhe studimet posdiplomike dyvjeçare, që e kanë titullin master, dhe kolegët e tyre të cilët i kanë përfunduar po të njëjtat vite të studimeve në Universitetin e Tetovës e kanë titullin magjistër. Kur në programin e AKM-së në të drejtën e udhëheqjes së temave të diplomës u bëhet diskriminim ndaj ligjëruesve, të cilët i kanë përfunduar studimet posdiplomime në Kosovë, në krahasim me ata të cilët i kanë përfunduar po të njëjta vite të studimit dhe në fushën e njëjtë në Maqedoni për arsye se në diplomat e tyre u shkruan magjistër. Zoti ministër, a jeni të informuar për këtë çështje?

Një çështje e ngritur si shqetësim kohëve të fundit, është në lidhje me furnizimin e barnave për pacientët të cilët vuajnë nga leukemia kronike. Deri në muajin janar të vitit 2015, pacientët të cilët vuajnë nga leukemia kronike janë furnizuar me barna nga Ministria e Shëndetësisë, kurse nga janari i vitit 2015 më nuk janë duke u furnizuar nga kjo Ministri. Pacientët janë të detyruar që këto barna t’i sigurojnë në mënyrë private, nga shitësit pa kompetencë, duke e ditur se ky lloj i barërave nuk lejohet të shitet në barnatore dhe kushton shumë.
Pyetja konkrete, për zotin ministër është: Pse është ndërprerë furnizimi me këtë lloj të veçantë të barnave ku varet jeta e pacientëve dhe çka është duke ndodhur me këto barna? Ku mund t’i marrin saktësisht pacientët këto barëra, në Ministri apo në klinikat në spitalet regjionale?

Më 24 korrik 2014, është bërë marrëveshja për transport ndërkombëtar rrugor në Prishtinë, me shtetin e Italisë, e ratifikuar nga presidentja Jahjaga, kurse ende pa ratifikuar nga shteti i Italisë. Çdo ditë po flasim për mbështetje të bizneseve të vogla dhe të mëdha, kurse operatorët ekonomikë kosovarë, të cilët ushtrojnë veprimtarinë për transportin e pasagjerëve me autobusë në destinacion ndërkombëtar me shtetin e Italisë, janë në një situatë shumë të palakmueshme, për të mos thënë, drejt falimentimit. Kjo është duke ndodhur pikërisht për shkak të mosveprimit të ministrive përkatëse, të cilat kanë marrëveshje bilaterale. Kompanitë transportuese kosovare janë të detyruara të paguajnë gjoba marramendëse pas çdo kontrolli nga policia italiane, ku shuma më e vogël është 2002 euro. Arsyeja e vetme e policisë rrugore italiane është, sepse nuk ka ratifikim të marrëveshjes nga shteti i Italisë. Masat ndëshkuese të cilat janë marrë me bllokim të autobusëve, ku nga fundi i vitit 2014 muaji dhjetor, deri më tani janë bllokuar 14 autobusë, ku 4 ende janë në bllokim me nga 60 ditë. Në qoftë se, bëjmë një llogaritje të thjeshtë, dëmet për bizneset kosovare sillen diku rreth 260 mijë euro, për të cilat janë të detyruara të paguajnë bizneset kosovare.
Zoti ministër, pyetja ime është: cilat janë masat konkrete, që i keni ndërmarrë në këtë drejtim, a keni kontaktuar me Ministrinë italiane, për të përshpejtuar ratifikimin e marrëveshjes? Me ratifikimin e kësaj marrëveshjeje ju do t’i ndihmonit bizneset kosovare, por njëkohësisht do t’i ndihmoni edhe të gjithë pasagjerët mërgimtarë që udhëtojnë me transport rrugor.

Kohë më parë, ministri i Shëndetësisë ka deklaruar se sigurimet shëndetësore brenda vitit 2015 nuk do të fillojnë se implementuari. Ne jemi të vetëdijshëm se është një çështje shumë komplekse, po ashtu siç jemi të vetëdijshëm që është një çështje e një rëndësie shumë të veçantë. Të sigurosh shëndetin nuk është luks, por është domosdoshmëri e kohës, për faktin se çdo ditë jemi të ekspozuar ndaj rreziqeve të paparashikueshme. Mendoj se nuk mjafton vetëm të thuhet për këtë se duhet përgatitje serioze, por duhet të merren hapa konkretë për të ecur përpara.
Pyetja ime është: Në cilën fazë të zhvillimeve gjendet sot Fondi për Sigurime Shëndetësore? A është formuar bordi drejtues? Cilat akte nënligjore janë përgatitur deri më tani? Sa akte dhe rregullore tjera kanë mbetur për t’u përgatitur, pasi e dimë që Ligji për sigurime shëndetësore ka të bëjë dhe lidhet me shumë çështje të cilat rregullohen me akte nënligjore?

I nderuari ministër, nevojat e qytetarëve të Prizrenit për kopshte publike të fëmijëve janë të shumta dhe janë të mëdha. Përveç familjes me rëndësi të madhe janë edhe institucionet jashtë familjare. Qasja në çerdhe dhe shkollimin e edukimin e hershëm është me rëndësi për dhënie të shanseve të barabarta të fëmijëve. Duke pasur parasysh që fëmijët e moshës së re mësojnë shpejt dhe i formojnë kompetencat e tyre themelore, siç janë perceptimi, fantazia, të menduarit, afërsia sociale, si dhe shkathtësia trupore, rëndësi të veçantë ka komunikimi në zhvillimin e inteligjencës së fëmijëve dhe socializmin e tyre si domosdoshmëri. Pra, çerdhja dhe grupi i lojës janë faktorë vendimtarë për fazat e mëvonshme të të mësuarit qoftë dhe në përgjithësi. Prizreni ka pasur një kopsht publik i cili quhej “Yllka” i hapur në vitin 1977 me kapacitet prej 240 fëmijë të moshës nga 6 muaj deri në 6 vjeç. Ky institucion ka qenë publik deri në vitin 2011, mirëpo nga viti 2011 funksionon si institucion privat i udhëhequr nga Kolegji “Mehmet Akif”. Nga viti 2011 Prizreni si qytet i dytë nga numri i banorëve në Kosovë mbetet pa kopsht publik të fëmijëve. Kërkesat dhe nevojat e qytetarëve të Prizrenit janë të shumta. 
Pyetja ime, i nderuari zoti ministër, është kjo: a do të keni si prioritet në zhvillimin e projekteve të juaja edukativo-arsimore hapjen e një kopshti publik në qytetin e Prizrenit?

Bazuar në Ligjin nr. 04/L-054 për statusin dhe të drejtat e dëshmorëve, invalidëve, veteranëve, pjesëtarëve të Ushtrisë Çlirimtare të Kosovës, viktimave civile dhe familjeve të tyre, neni 6 - beneficionet e veçanta, paragrafi 4 - lirim nga tatimi në pronë, i cili është e drejtë ta realizojnë familjet e dëshmorëve, familjet e të zhdukurve të UÇK-së, invalidët e UÇK-së, invalidët civilë të luftës, familjet e viktimave civile të luftës që janë në gjendje të rëndë ekonomike. Pyetja konkrete për ministrin është:

Pse nuk po zbatohet Ligji për lirim nga tatimi në pronë për kategoritë e lartcekura sipas nenit 6, paragrafi 4, respektivisht për familjet e dëshmorëve dhe invalidëve të luftës?