Ju lusim të na informoni me procesin e demarkacionit me Malin e Zi, mbi çfarë
baze ligjore dhe kushtetuese po diskutohet ky proces, a po respektohen kufijtë e vitit 1974? A ka Komisioni qeveritar material dokumentues për këtë çështje mjaftueshëm, sepse një komision  lokal i komunës së Pejës, ka argumente të mjaftueshme, një ndër to po e citoj sot, hartën e vitit 1974, e cila është e hartuar ekskluzivisht nga autorë serbë, malazias e kroatë. Nuk është asnjë shqiptar në hartimin e kësaj harte, andaj kjo hartë e ka atë argumentin e fuqishëm për anën e Kosovës. 

Lidhja Demokratike e Kosovës, më 25 shkurt 2015, e ka ngrehur çështjen e degradimit të lumenjve në nivel vendi, me theks të veçantë ankesën e komunitetit të Fshatit Gllaviqicë dhe banorëve të Komunës së Pejës, për shkatërrimin e lumit Lumbardhë, me këtë rast Lidhja Demokratike e Kosovës ja ka ofruar materialet e mjaftueshme dhe ju ka dhënë afat deri në muajin qershor për të ndërmarrë masa në mbrojtjen e lumenjve dhe rrjetin kriminal të gurëthyesve në Kosovë.
Çfarë keni ndërmarrë konkretisht për stopimin e këtyre veprimeve krejtësisht joligjore dhe shumë të dëmshme për vendin dhe qytetarët? A jeni në njohuri se të gjitha institucionet relevante në lidhje me këtë çështje nuk e kanë kryer obligimin ligjor, duke filluar nga Ministria e Ambientit, Komisioni për Miniera dhe Minerale, Kuvendet Komunale, Inspektorati dhe Policia e Kosovës? Këto institucione nuk i respektojnë ligjet e Kosovës dhe ju duhet të jepni përgjegjësi për gjendjen alarmante në nivel vendi.